सिंधुदुर्ग : मुबंई गोवा महामार्गावर हुंबरट येथे भीषण अपघात झालाय. या अपघातात तिघांनाही गंभीर दुखापत दुखापत झाली असून एकाचा जागीच मृत्यू झाला आहे. घाटकोपर-मुंबई येथून गोव्याला जाणारी भरधाव वेगातील वॅगनर कार चालकाचे नियंत्रण सुटल्याने दुभाजकावर आदळली. हुंबरठ येथील उड्डाणपुलावर गुरुवारी सकाळी ९.४५च्या सुमारास झालेल्या या अपघातात कारचालक प्रविण सुंदर शेट्टी (४०) यांचा जागीच मृत्यू झाला. तर प्रविण यांची पत्नी काव्या प्रविण शेट्टी (३५), मुलगी आर्वी प्रविण शेट्टी (९) व सिद्धेश भाऊसाहेब सटाले (३०. सर्व रा. मुंबई) यांनाही गंभीर दुखापत झाली आहे. अपघातानंतर स्थानिक ग्रामस्थ, कणकवली पोलीस, महामार्ग पोलीस, वाहतूक पोलीस घटनास्थळी दाखल झाले. जखमींना खासगी वाहनाद्वारे कणकवली उपजिल्हा रुग्णालयात दाखल करण्यात आले होते. अपघातात वॅगनर कारच्या दर्शनी भागाचा अक्षरशः चक्काचूर झाला होता.
मिळालेल्या माहितीनुसार मुबंई वरून गोव्याच्या दिशेने व्हॅगनार कारने गोव्यामध्ये फिरण्यासाठी हे जात होते कोल्हापूर वरून गगनबावडा मार्गे येत असताना हुबरट ब्रिजवर व्हॅगनार कारचा भीषण अपघात झाला. हा अपघात हुबरट ब्रिजवर टायर फुटून अपघात झाल्याची माहिती समोर येत आहे.
हे पर्यटक गोव्यामध्ये नववर्षाच्या स्वागतासाठी सेलिब्रेशन करण्यासाठी जात होते. मात्र प्रवासादरम्यान त्यांच्यावर काळाने घाला घातला असून त्यामध्ये तिघेजण गंभीर असून एक जण जागीच ठार झाला आहे. यामध्ये नऊ वर्षाच्या बालिकेचा देखील समावेश आहे. अपघातामध्ये जखमी झालेल्याना कणकवली उपजिल्हा रुग्णालयामध्ये हलविण्यात आले असून त्यांच्यावर उपचार सुरू आहेत अशी माहिती कणकवली पोलिसांनी दिली आहे.
