मुंबई: दुबईहून निकाग्वाराला जाणारं विमान गेल्या आठवड्यात फ्रान्समध्ये रोखण्यात आलं. तिथल्या तपास यंत्रणांनी विमानाला उड्डाणाची परवानगी दिली नाही. मानवी तस्करीचा संशय असल्यानं त्यांनी प्रवाशांची चौकशी सुरू केली. या विमानात ३०३ भारतीय प्रवासी होते. पैकी २७६ प्रवासी मुंबईत परतले. फ्रान्सच्या तपास यंत्रणांनी चार दिवसांनंतर विमानाला उड्डाण करण्याची परवानगी दिली. त्यानंतर हे विमान मुंबईत परतलं. विमानातील २७ प्रवाशांनी फ्रान्स सरकारकडे शरणागती पत्करली आणि आश्रय देण्याची याचना केली. त्यांची विनंती मान्य करण्यात आली.
रोमानियातील लीजंड एअरलाईन्सचं विमान २१ डिसेंबरच्या दुपारी इंधन भरण्यासाठी फ्रान्सच्या वॅट्री विमानतळावर उतरलं. या विमानातून मानवी तस्करी होत असल्याची गोपनीय माहिती फ्रान्सच्या तपास अधिकाऱ्यांना मिळाली होती. त्यांनी विमान रोखलं आणि प्रवाशांची चौकशी सुरू केली. त्यांचा तपास, चौकशी ४ दिवस चालली. या प्रकारामुळे जगभरात खळबळ माजली.
हैदराबादमधील एक जण या सगळ्याचा मास्टरमाईंड असू शकतो, असा संशय आहे. भारतीय तपास यंत्रणांनी टाईम्स ऑफ इंडियाला दिलेल्या माहितीनुसार, नुकत्याच झालेल्या घटनेची शशी किरण रेड्डीचा संबंध असण्याची शक्यता आहे. गेल्या वर्षीही रेड्डीचं नाव मानवी तस्करीच्या घटनेत समोर आलं होतं.
जानेवारी २०२२ मध्ये गुजरातच्या दिगुंचा गावातील चौकोनी कुटुंब कॅनडाच्या मॅनिटोबात मृतावस्थेत सापडलं होतं. त्यांचे मृतदेह गोठलेल्या स्थितीत सापडले होते. ते अवैध पद्धतीनं अमेरिकेत शिरण्याचा प्रयत्न करत होते. मृतांमध्ये दाम्पत्य आणि त्यांच्या दोन अल्पवयीन मुलांचा समावेश होता. एकूण ११ जणांचा गट अमेरिकेत अवैधपणे शिरण्याचा प्रयत्न करत होता. त्यात चौघांचं कुटुंब होतं.
टाईम्स ऑफ इंडियाला सुत्रांनी दिलेल्या माहितीनुसार, रेड्डी गेल्या १५ वर्षांपासून मानवी तस्करी करतो. तोच निकाग्वाराला जाणाऱ्या विमान प्रकरणातील मास्टरमाईंड असण्याची शक्यता आहे. अमेरिकेत अवैधपणे जाऊ इच्छिणाऱ्यांना दुबईहून निकाग्वाराला पाठवायचं आणि तिथून रस्तेमार्गे त्यांना अमेरिकेत अवैधपणे सोडायचं, हा रेड्डीचा उद्योग आहे.
निकाग्वाराला जाणाऱ्या विमानातील ३०३ पैकी ९६ जण गुजरातचे होते. गेल्या दोन महिन्यात रेड्डीनं निकाग्वारातून तब्बल ८०० जणांना अवैधपणे अमेरिकेत पाठवल्याचा आरोप आहे. त्यानं यापूर्वी ५० आसनी विमानातून तस्करी केली. त्यानंतर फ्रेंच अधिकाऱ्यांना संशय आला. त्यांनी एका फ्लाईटला विमानतळावर उतरण्याची परवानगी नाकारली. त्यामुळे विमानाला दुबईला परत जावं लागलं. त्यामुळे रेड्डीनं ३०० प्रवाशांना घेऊन जाणाऱ्या विमानाची व्यवस्था केली. हे विमान रोखलं जाणार नाही. त्याला इंधन भरण्याची परवानगी मिळेल असा त्याचा अंदाज होता. पण हा अंदाज चुकला.
