जन्मत: अंध, बासरी वादन करत उदरनिर्वाह; रोहिदास आल्हादांच्या लढाईला पोलिसांचे बळ
धुळे : जन्माने अंध असलेले धुळे तालुक्यातील मोराणे येथील रहिवासी असलेले रोहिदास आल्हाद हे गेल्या अनेक वर्षांपासून धुळे शहरात बासरी वादन करत आहेत. आपल्याला आपल्या कलेच्या माध्यमातून मिळेल त्या कमाईतून स्वतःसह कुटुंबाचा उदरनिर्वाह भागवत आहे. त्यांनी जिल्हा परिषदेच्या एक अधिकाऱ्याच्या मदतीने कॅलेंडर विक्रीचा व्यवसायाला सुरावात केली आहे. त्यांना आपली बायको गंगुबाईंची खंबीर साथ आहे.
आजच्या युगात अनेक कारणे सांगून नोकरी आणि व्यवसाय न करणाऱ्या धडधाकटांच्या डोळ्यात धुळे शहरातील गरुड कॉम्प्लेक्स बाहेरील डोळस व्यवसाय करत असणारा अंध व्यक्ती झणझणीत अंजन घालत आहे. त्यांच्या लढाईला धुळेकरांचे तर बळ मिळतेच पण आज पोलिसांचेही बळ मिळाले असून त्यांच्या व्यवसायाची दखल घेऊन पोलीस अधीक्षक श्रीकांत धिवरे आणि एलसीबीचे पोलिस निरीक्षक दत्तात्रय शिंदे यांनी त्यांच्याकडील सर्वच कॅलेंडर विकत घेऊन त्यांना माणुसकीचा हात दिला आहे.
पोलिस अधीक्षक श्रीकांत धिवरे यांनी पदभार घेतल्यानंतर जिल्ह्याचे वातावरण बदलत आहे. पोलिसांनी अवैधधंदे करणाऱ्यांना सळो की पळो करून सोडले आहे. बेशिस्तांना शिस्त लावताना पोलीस कठोर भासत आहेत. मात्र, एसपी श्रीकांत धिवरेंमध्ये दडलेल्या सहृदयी व्यक्तीमत्त्वाची झलक वेळोवेळी दिसत आहे. एका दृष्टीहीन व्यक्तीकडील सर्व दिनदर्शिका विकत घेवून पोलीस अधीक्षक श्रीकांत धिवरेंनी त्यांना माणुसकीच्या नात्याने मदतीचा हात दिला आहे.
धुळे शहरातील रस्त्यावर रोहिदास अल्हाद है अत्यंत सुंदर बासरी वादन करताना दिसतात. धुळेकरांना ते चांगलंच परिचीत आहे. येणारे जाणारे त्यांची कला बघून मंत्रमुग्ध होतात. कलेची कदर करणारा लगेच मदत करतो. अनेकदा त्यांच्या समवेत त्यांच्या पत्नीही असतात. त्या देखील दिव्यांग आहे. सध्या हे जोडपे कॅलेंडर विकून दोन पैसे जोडण्याचा आटापिटा करत आहे.
आज रोहिदास आल्हाद यांची दाखल घेत पोलीस अधीक्षक श्रीकांत धिवरे यांनी प्रत्यक्ष त्यांची भेट घेतली. यावेळी रोहिदास आल्हाद यानी आपली कला पोलीस अधीक्षक श्रीकांत धिवरे यांच्या समोर सादर केली. त्यावर धिवरेंनी देखील त्यांचे मुक्तकंठाने त्यांचे कौतूक केले. इतक्यावरच न थांबता त्यांनी रोहिदास आल्हाद यांच्याकडील सर्व कॅलेंडरही विकत घेवून त्यांना ५ हजार रूपयांची मदत केली. सारे अनपेक्षितपणे घडून आल्याने दिव्यांग जोडप्याच्या चेहऱ्यावरचा आनंद ओसंडून वाहताना दिसला. श्रीकांत धिवरेंनी दाखवलेल्या सहृदयतेमुळे पोलीस दलाची प्रतिमा जनमानसात आणखीच उजळली आहे.