पुण्यात भीषण अपघात, दोघांचा जागीच मृत्यू; एसटी, दुचाकीला वाचवताना पिकअप खड्ड्यात
पुणे : जुन्नर तालुक्यातील कल्याण-नगर महामार्ग हा मृत्यूचा सापळा बनत असल्याचे पाहायला मिळत आहे. दर आठ ते पंधरा दिवसांनी या महामार्गावर अपघात होत असून अनेकांना आपले प्राण गमवावे लागले आहेत. आज सकाळच्या सुमारास ओतूर जवळ असणाऱ्या कोळमाथा येथे एसटी, पिकअप व मोटारसायकलचा विचित्र अपघात झाला. या अपघातात मोटारसायकलवरील दोघांचाही मृत्यू झाला आहे. सकाळी सव्वा अकराच्या सुमारास हा अपघात झाला. दुचाकी आणि एसटीला वाचवण्याच्या नादात पीक अप चालकाने गाडी खड्ड्यात घातली.
कल्याण-नगर महामार्गांवर ओतूर जवळील कोळमाथा नामे शिवारात एसटी बसला दुचाकीची जोरदार धडक बसून आणि त्याच बरोबर पिकअप गाडी अपघात वाचवताना खड्ड्यात जाऊन पलटी झाल्याने भीषण अपघात झाला. या अपघातात दुचाकीवरील दोन जण जागीच ठार झाल्याची माहिती समोर येत आहे. अपघाताची माहिती मिळताच ओतूर पोलीस स्टेशनचे सहाय्यक पोलीस निरीक्षक सचिन कांडगे यांच्या मार्गदर्शनाखाली पोलीस हवालदार नामदेव बांबळे घटनास्थळी तातडीने पंचनामा करण्यासाठी पोहोचले.
नगर – कल्याण महामार्गावर अपघाताचे प्रमाण दिवसेंदिवस वाढत आहे. या अपघातात अनेकांना आपला जीव गमवावा लागला आहे. आज सकाळचा अपघात अतिशय भयानक होता. त्यात दुचाकीवरील दोघांचा जागेवर मृत्यू झाला आहे. या अपघातानंतर महामार्गावर काही वेळ वाहतूककोंडी झाल्याचे पाहायला मिळाले. पोलिसांकडून वाहने बाजूला करण्याचे काम सुरू आहे. या अपघातामुळे नगर – कल्याण महामार्गावरुन प्रवास करणाऱ्या प्रवाशांच्या सुरक्षेचा प्रश्न ऐरणीवर आला आहे.
