आधी तरुणाची हत्या, नंतर मृतदेहाचे ८ तुकडे; प्रेमसंबंधातून बहिणीच्या प्रियकराला संपवलं
हिमाचल प्रदेशातील चंबा जिल्ह्यात एक धक्कादायक घटना समोर आली आहे. मुंबईत सरस्वती आणि दिल्लीत श्रद्धाच्या हत्येनंतर आता चंबामध्ये हत्या करुण मृतदेहाचे तुकडे केल्याचं प्रकरण समोर आलं आहे. जिथे २१ वर्षीय तरुणाची निर्घृण हत्या करण्यात आली. हत्या केल्यानंतर त्याच्या मृतदेहाचे ७ ते ८ तुकडे करण्यात आले. गोणीत तुकडे बांधून मृतदेह नाल्यात फेकून दिला. मृत तरुण ६ जूनपासून बेपत्ता होता. पोलिसांनी मयताचा मृतदेह ताब्यात घेऊन शवविच्छेदन करून नातेवाईकांच्या ताब्यात दिले. या प्रकरणी पोलिसांनी तीन आरोपींना अटक केली आहे.
मिळालेल्या माहितीनुसार, २१ वर्षीय मनोहरचे किहार, सलोनी, चंबा येथील बांदल गावात एका मुस्लिम तरुणीसोबत प्रेमसंबंध होते. मुलीच्या घरच्यांना मनोहर आवडत नव्हता. मुलीच्या भावांनी मनोहरची हत्या केल्याचा आरोप आहे. हत्या केल्यानंतर त्यांनी मनोहरच्या मृतदेहाचे ८ तुकडे केले. नंतर हे तुकडे गोणीत बांधून नाल्यात फेकले.
ही बाब ९ जून रोजी उघडकीस आली. जेव्हा काही लोक या नाल्याजवळून जात होते, तेव्हा त्यांना विचित्र वास आणि त्यांनी ही बाब पोलिसांना कळवली. माहिती मिळताच पोलीस घटनास्थळी दाखल झाले. पोलिसांनी तपास केला असता त्यांना मनोहरच्या शरीराचे अवयव एका गोणीतून सापडले.
चंबा एसपी अभिषेक यादव यांनी हत्येला दुजोरा दिला आहे. त्यांनी सांगितले की, “भंडाळ येथील २१ वर्षीय तरुणाची हत्या झाल्याची घटना समोर आली आहे. तरुण गेल्या काही दिवसांपासून बेपत्ता होता. त्याचा मृतदेह नाल्यात सापडला. तरुणाची हत्या करून मृतदेहाचे तुकडे करण्यात आले. या प्रकरणी ३ आरोपींना अटक करण्यात आली आहे. या प्रकरणाचा पुढील तपास सुरु आहे.
