धुळे : तोतया जीएसटी अधिकारी असल्याचे भासवून पटियालाच्या एका व्यापाऱ्याला मुंबई आग्रा महामार्गावर गंडा घालण्यात आला होता. मात्र, व्यापाऱ्याने हिम्मत दाखवून आझाद नगर पोलिसांत फिर्याद दाखल केल्यानंतर भलतेच प्रकरण चव्हाट्यावर आले. व्यापाऱ्याला लुटणारे कोणी दुसरे तिसरे नव्हे तर चक्क पोलिसचं निघाले. या नाजूक घटनेचा धुळे जिल्हा पोलिस अधीक्षक श्रीकांत धिवरे यांनी सोक्षमोक्ष लावण्याचे धाडस दाखवलं आहे. परिणामी, निजामपूर येथील तैनात भ्रष्ट ए.एस.आय बिपीन पाटील, मोहाडी पोलीस ठाण्याचा कर्मचारी इम्रान शेख आणि नाशिक येथील महिला पोलीस अधिकारी बिपिन पाटील यांची बहिण स्वाती पाटील यांना पोलिसांनी ताब्यात घेतलं आहे.
पटियाला येथील व्यापारी कश्मीरसिंग हजारासिंग बाजवा यांच्या मालाचा मालट्रक पी.बी. ११, सी.झेड. ०७५६ हा महामार्गावर अडवण्यात आला होता. तेव्हा लाल दिव्याच्या टाटा सुमोतून आलेल्या तोतया जीएसटी अधिकाऱ्यांनी गाडीतील मालाच्या पावत्यांमध्ये फर्मचे नाव चुकलं आहे. त्यापोटी १२ लाख ९६ हजारांच्या दंडाची मागणी केली होती. अखेरीस तडजोडअंती १ लाख ३० हजार रूपये देण्याचे ठरले होते. ही रक्कम गुगल-पेवरून बिपीन पाटील याची नाशिक येथील त्यांची बहिण स्वाती रोशन पाटील हिच्या खात्यावर वर्ग करण्यात आली होती. गोपनीयता राहावी म्हणून सर्व संभाषण व्हॉटस्अॅपद्वारे करण्यात आले होते.
या प्रकरणी सरदार बाजवा यांनी ४ जानेवारी रोजी आझाद नगर पोलिसांत फिर्याद दिली होती. त्यानंतर पोलीस अधीक्षक श्रीकांत धिवरे यांनी या घटनेचा सखोल तपास करण्याची जबाबदारी पोलीस उपविभागीय अधिक्षक एस. ऋषिकेश रेड्डी, पीआय बाळासाहेब थोरात यांच्यावर सोपवली होती. त्यानंतर तपासासाठी विशेष पथक गठीत झाले. या पथकाने संशयीतांचे कॉल डिटेल्स गुंडाळले. अखेर तिघांपर्यंत पोहचण्यात आझाद नगर पोलिसाना यश आलं आहे.
बिपीन पाटील हा सध्या निजामपूर पोलिसांत ए.एस.आय पदावर कार्यरत आहे. त्याच्याकडे निजामपूर पोलीस ठाण्याचे शासकीय वाहन असून तो त्याच वाहनाद्वारे साथीदारांसह महामार्गावर जीएसटी अधिकारी बनून लूटमार करत होता. पोलीस तपासात आतापर्यंत त्याने ७१ लाख ३३ हजार ९८४ रूपयांची लूट केल्याचं समोर आलं आहे. मात्र, हा आकडा कोट्यावधीच्या घरात असण्याचा अंदाज आहे. शिवाय, यात बडे मासेही अडकण्याची शक्यता देखील वर्तवण्यात येत आहे.
