जखमींना भोकर ग्रामीण रुग्णालयात उपचारासाठी दाखल करण्यात आले आहे.
भोकर : शहरातील बायपास मार्गावरील उमरी रस्त्यावर ट्रकने ऑटोरिक्षाला आज दुपारी ४ वाजेच्या सुमारास जोरदार धडक दिली. यात ऑटोरिक्षातील प्रवासी महिलेचा जागीच मृत्यू झाला. तर महिलेच्या पतीसह चालक गंभीर जखमी झाला आहे.
कौशल्याबाई लक्ष्मण कोईलवाड (५० वर्षे, रा. रायखोड ता. भोकर) असे मयत महिलेचे नाव आहे. याबाबत अधिक माहिती अशी की, कौशल्याबाई लक्ष्मण कोईलवाड या पतीसह भोकर येथून रायखोडकडे ऑटोरिक्षामधून (क्र. एम एस २६ एजी ४१५७) प्रवास करत होते. दरम्यान, म्हैसाकडून नांदेडकडे जाणाऱ्या एका भरधाव ट्रकने (क्र. एपी ०७ टीजी २२५९) बायपासवरील सुभेदार चौक येथे ऑटोरिक्षाला जबर धडक दिली.
या भीषण अपघातात कौशल्याबाई लक्ष्मण कोईलवाड यांचा जागीच मृत्यू झाला. तर लक्ष्मण कोईलवाड व ऑटोरिक्षाचालक गंभीर जखमी झाले आहेत. जखमी चालकाचे नाव समजू शकले नाही. जखमींना ग्रामीण रुग्णालयात उपचारासाठी दाखल करण्यात आले आहे.
