लातूर : उदगीरचे माजी नगराध्यक्ष राजेश्वर निटुरे यांना पुत्रशोक झाला आहे. निटुरे यांचा मुलगा प्रसाद निटुरे यांचे अपघातामध्ये निधन झाले, तर अन्य दोघे जण गंभीर जखमी झाले आहेत. जखमींवर रुग्णालयात उपचार सुरु आहेत. हा अपघात इतका भीषण होता, की कार जागेवरच उलटी होऊन तिचा अक्षरशः चुराडा झाला
लातूर जिल्ह्यातील उदगीरचे माजी नगराध्यक्ष राजेश्वर निटुरे यांच्या मुलाचे अपघाती निधन झाल्याचे वृत्त समोर आले आहे. प्रसाद निटुरे यांचं अपघातामध्ये निधन झालं आहे. आज पहाटे नागपूर रत्नागिरी महामार्गावरील आशिव पाटी येथे हा अपघात झाला. रस्त्यावर थांबलेल्या भाजीपाल्याची वाहतूक करणाऱ्या टेम्पोवर प्रसाद निटूरे यांची भरधाव वेगात असणारी एम एच 24 एएस 1600 या क्रमांकाची कार आदळली.
हा अपघात इतका मोठा होता की कार जागीच पलटी होऊन तिचा चेंदामेंदा झाला. अपघाताची ही भयाण दृश्यं सीसीटीव्ही कॅमेऱ्यात कैद झाली आहेत. या अपघातात प्रसाद निटुरे यांच्यासह तिघे जण गंभीर जखमी झाले. जखमींना रुग्णालयात दाखल करेपर्यंत प्रसाद निटुरे यांचं निधन झालं. तर अन्य दोघांवर उपचार सुरु आहेत.
