परभणी: परभणीच्या राहटी पुलाखाली एका व्यक्तीचा मृतदेह आढळून आला आहे. या प्रकरणी पोलिसात नोंद करण्यात आली आहे. पाण्याचा अंदाज न आल्याने नदी पात्रात बुडून या व्यक्तीचा मृत्यू झाल्याचा अंदाज वर्तवला आहे. राहटी पुलाखाली हातपाय धुण्यासाठी गेलेल्या इसमास पाण्याचा अंदाज न आल्याने नदी पात्रात बुडून मृत्यू झाला असावा, अशी माहिती पूर्णा पोलीस ठाण्यात देण्यात आली आहे.
मिळालेल्या माहितीनुसार, सचिन घन हा व्यक्ती हा १२ डिसेंबरपासून परभणी शहरातील येलदरकर कॉलनी येथून बेपत्ता होता. याबाबत १३ डिसेंबर रोजी नवा मोंढा पोलीस ठाण्यात खबर देण्यात आली होती. या इसमाचा मृतदेह आढळल्याने आता पूर्णा पोलीस ठाण्यात अकस्माक मृत्यूची नोंद करण्यात आली आहे. प्रभाकर संदलापुरकर यांनी पूर्णा पोलिसात खबर दिली आहे. त्यांचे मावस भाऊ सचिन घन (४७ वर्ष, येलदरकर रा. कॉलनी, परभणी) हे १२ डिसेंबर रोजी दुपारी २ च्या सुमारास घराबाहेर पडले होते. पंधरा मिनिटात परत येतो, असे सांगुन बाहेर पडलेले सचिन घन सायंकाळपर्यंत परत न आल्याने १३ डिसेंबर रोजी याबाबत नवा मोंढा पोलीस ठाण्यात बेपत्ताची नोंद देण्यात आली.
१४ डिसेंबर रोजी सायंकाळी ५.३० च्या सुमारास प्रभाकर संदलापुरकर यांना त्यांच्या भाच्याने फोन करुन सचिन घन यांचा मृतदेह राहटी पुलाखाली पूर्णा नदी पात्रात आढळला असल्याचे सांगितले. पोलिसांच्या मदतीने मृतदेह शवविच्छेदनासाठी शासकीय रुग्णालयात आणण्यात आला. सचिन घन हे राहटी पुलाखाली हातपाय धुण्यासाठी गेले असावेत. त्यांना पाण्याचा अंदाज न आल्याने नदी पात्रात बुडून मृत्यू झाला असावा, अशी खबर पूर्णा पोलिसात देण्यात आली आहे. या प्रकरणी पुढील तपास पो. ह. काळे करत आहेत.
