नांदेड,2- हिमायतनगर पंचायत समिती येथे गुरुवार दिनांक 4 जुलै रोजी तक्रार निवारण दिनाचे आयोजन करण्यात आले आहे. जिल्हा परिषदेच्या प्रशासक तथा मुख्य कार्यकारी अधिकारी मीनल करणवाल यांच्या अध्यक्षतेखाली सकाळी 11 वाजता पंचायत समितीच्या सभागृहात तक्रार निवारण सभा घेण्यात येणार आहे.
हिमायतनगर तालुक्यातील विविध विषयासंदर्भात पंचायत समिती व जिल्हा परिषद स्तरावर प्राप्त झालेल्या तक्रारीचा निपटारा यावेळी करण्यात येणार आहे.
ज्या तक्रारदारांनी तक्रारी दिलेल्या आहेत अशा तक्रारदारांना पंचायत समितीच्या वतीने उपस्थित रहाण्याचे आवाहन करण्यात आले आहे. यावेळी मुख्य कार्यकारी अधिकारी मीनल करणवाल व जिल्हा परिषदेचे सर्व खाते प्रमुख तक्रार निवारण सभेसाठी उपस्थित राहून तक्रारींचा निपटारा करणार आहेत, अशी माहिती सामान्य प्रशासन विभागाचे उपमुख्य कार्यकारी अधिकारी राजकुमार मुक्कावार यांनी दिली आहे.
